Ishq Bhi Khel Hai Nasibon Ka

is se pahle ki be-wafa ho jaaen
kyuu na ai dost ham juda ho jaaen

tu bhi hiire se ban gaya patthar
ham bhi kal jaane kya se kya ho jaaen

tu ki yakta tha be-shumar hua
ham bhi TuTen to ja-ba-ja ho jaaen

ham bhi majburiyon ka uzr karen
phir kahin aur mubtala ho jaaen

ham agar manzilen na ban paaen
manzilon tak ka rasta ho jaaen

der se soch men hain parvane
raakh ho jaaen ya hava ho jaaen

ishq bhi khel hai nasibon ka
ḳhaak ho jaaen kimiya ho jaaen

ab ke gar tu mile to ham tujh se
aise lipTen tiri qaba ho jaaen

bandagi ham ne chhoḌ di hai ‘faraz’
kya karen log jab ḳhuda ho jaaen

Ahmed Faraz